Saturday, July 21, 2012

60. අවසන් ඇමතුම…

575913_10150956480297492_296162501_n

“මචං අද මාව ඇතුලට දානවා…
මොබයිල් එකක් නම් නැති වෙයි…”
ලැබුන අවසන් ඇමතුම උඹෙන්…
දිනෙක එනබව දැනන් හිටියත්…
නොසිතීමි මෙතරම් කලින්…
හදිසියෙන්, හරි හුඟක් කෙටියෙන්…

ඒ නිසාමයි බැරිවුනේ…
උඹට දැනමුතුකමක් දෙන්නට…
උනේ ඒ වෙනුවට අසන්නට…
“දැන් මොකද්ද මචං මගෙන් වෙන්න ඕනේ..?”

උඹයි දැනමුතුකම් කියන්නේ…
මමයි නිහඬව අසා ඉන්නේ…
“මොකුත් නෑ උඹ හොඳින් ඉඳපන්…
ගෙදර අයවත් මතක් කරපන්…”
“ගියොත් මව් රට අද හෙටම උඹ…
අම්මා මගෙ යහතින්ද බලපන්…”

සතුට මේ යැයි හොයන ලෝකෙක…
යනෙන හැම තැන සතුට වපුරන…
හිර වුනත් උබ අඳුරු කුටියක…
හිර කරන්නට බැරිවෙයන්…
හිරගෙදර උස බිත්ති ඇතුලෙත්…
උඹට ඉර හඳ පායපන්…

උඹද ඇතුලේ අපිද නොදනිමි…
දුවන ලෝකෙක හැල්මේ දිවයමි…
හිර වුනත් උඹ මුවඟ නොමැකෙන…
සොඳුරු සිනහව තිබීයන්…
උඹේ හදවත වටිනකම දැන…
අලුත් මිතුරන් ලැබීයන්…

ප.ලි. : උගේ නම...? 'මචං'... වැරැද්ද...? වැරදිකාරයෙක් නෙමෙයි... හිරගෙදර ඉන්න අනිත් හුඟදෙනෙක් වගේම...

Friday, July 13, 2012

මියුසික් | Music

බස් රේඩියෝ බ්ලොග් සතිය ප්‍රචලිත කිරීම වෙනුවෙන් දින හතක් පුරාවට ආගන්තුක ගීත පෝස්ට් කරන අතරේම ආගන්තුක සංගීත ශිල්පීන් කිහිපදෙනෙක් ගැනත් පෝස්ට් කරන්න හිතුවේ පොඩි ඉල්ලීමකුත් ඉටුකරන්න එක්කයි…

මම සජීවී සංගීත ප්‍රසංග අති විශාල ප්‍රමාණයක් නරඹා නැහැ… නමුත් ඒ සුළු ප්‍රසංග කිහිපය අතරේ මා වික්ශිප්ත කල සංගීත ශිල්පියෙක් ඇත්නම් ඔහු ජෙසී කුක්… සැබැවින්ම ඔහු මැජික් කරුවෙක්… ෆ්ලෙමින්කෝ ගිටාරයේ කම්බි අතරේ ඔබ මොබ ගෙනයන ඇඟිලි තුඩුවලින් ඔහුට හැකියි ඔබගේ හෲද ස්පන්දනය නවතන්නට… මාව විශ්වාස නැතිනම් පහතින් ඇති ඔහුගේ නිර්මාණ කිහිපයක් රසවිඳින්න…

ලෝකයේ කොහේ හෝ කොනක ඔබට ඔහුගේ සංගීත ප්‍රසංගයක් ඇස ගැටුණහොත් එය නැරඹීමේ අවස්ථාව පැහැර හරින්නට නම් එපා…







මේ කෙලී ගමියාඕ…අතිශය ජනප්‍රිය සංගීත ශිල්පියෙක් නම් නෙවෙයි… නමුත් යුකලෙයිලී ගිටාර් විශේඥයෙක්… පුංචි නේම් ඩ්‍රොපින් පාරකුත් දානවානම් අන්තර්ජාලයේ මගේ මිතුරෙක් Smile… සෑම මොහොතක්ම පුදුමාකාර සතුටකින් ගතකරන සරල මිනිසෙක්…  මේ මීට මාස කිහිපයකට පෙර හයි-සෙශන්ස් නම් අන්තර්ජාල සංගීත වැඩසටහනේදී තන්තු හතරක පුංචි ගිටාරයකින් ඔහු දිඟු කතාවක් පැවසූ අයුරු…







ජෙස් ගේ ගීත ඇල්බම් මිලදී ගන්නට බලාපොරොත්තු වෙනවා නම් ඒ මේවායි
කෙලී ගේ ගීත ඇල්බම් තවම නම් එකයි… ඒක මෙතනින්

තවත් සිංදුවක් සමගින් හෙට හමුවෙමු..!!!

Thursday, July 12, 2012

සෙනහස, නිසැකවම එය සුව කරාවි | I'm Gonna Love You Through It

මේ බස් රේඩියෝ බ්ලොග් සතිය ප්‍රචලිත කිරීම වෙනුවෙන් පළවෙන පස්වෙනි පෝස්ටුව…

පලවෙනි පෝස්ටුව 1. හාදුවක්! සඳ එළියේ… | Just A Kiss
දෙවනි පෝස්ටුව 2. ටිකිලා සහ නුඹ, නිරතුරු මා මත්කරන… | ‍You and Tequila make me crazy
තුන්වෙනි පෝස්ටුව 3. මතකයන් ඔබේ… | Remind Me
හතරවෙනි පෝස්ටුව 4. ගොවිපලේ සොඳුරිය… | Farmer's Daughterල්

“දළදා හාමුදුරුවන්ගේ පිහිටෙන් දැන් ටිකක් හොඳයි…”   තාත්තා පවසන්නේ ඇඳ අසලින් මෑත් වෙමින්…

මම ඇයගේ සුදුමැලි සුරත අල්ලා ගනිද්දී අපසුවෙන් ඇස් හරින ඇය නැවතත් එය අඩවන් කරගන්නේ මා සුරත තදින් මිරිකා ගන්නා අතරේයි… කය දවමින් නැඟෙන වේදනාව හා සටන් කිරීමෙන් වෙහෙස වු ඇයගේ සීතල අත්ලට දැනෙනා මා සුරතේ උණුසුම ඇයට ජීවිතය පිළිබඳව නව බලාපොරොත්තු උපදවනවා වෙන්නට ඇති… පවුලේ කෙනෙකු අසාඬ්ය රෝගයකින් පෙලෙන්නට පටන් ගත්විට මනසින් කඩා වැටෙන්නේ රෝගියා පමණක් නොවෙයි ඔහු හෝ ඇයට ආදරය කරන හැමදෙනාමයි…

මේ ගීතය ගැන නම් පෝස්ට් දහයක් ලියන්න තරම් දේවල තිබ්බත් මේ ඒ සඳහා වෙලාව නෙමෙයි… අදටත් මගේ සමීපතමයෙක් ලෙඩ ඇඳේ සිටිනා විට හඬන මා සිතට ශක්තියක් උපදවා දෙන්නට  භාවනාවක් වැනි මේ ගීතයට පුළුවන්…

ලොව පුරා පිලිකා රෝගය හා සටන් කරන රෝගීන් සහ ඔවුන්ගේ සමීපතමයන් වෙනුවෙන් මේ ගයන්නේ “Martina McBride”

මියුසික් වීඩියෝව
Martina McBride - I'm Gonna Love You Through It

ගී පද
Martina McBride - I'm Gonna Love You Through It Lyrics

MP3 සිංදුව බාගන්න…
Martina McBride - I'm Gonna Love You Through It
තවත් සිංදුවක් සමගින් හෙට හමුවෙමු..!!!

Wednesday, July 11, 2012

ගොවිපලේ සොඳුරිය… | Farmer's Daughter

මේ බස් රේඩියෝ බ්ලොග් සතිය ප්‍රචලිත කිරීම වෙනුවෙන් පළවෙන හතරවෙනි පෝස්ටුව…
පලවෙනි පෝස්ටුව 1. හාදුවක්! සඳ එළියේ… | Just A Kiss
දෙවනි පෝස්ටුව 2. ටිකිලා සහ නුඹ, නිරතුරු මා මත්කරන… | ‍You and Tequila make me crazy
තුන් වෙනි පෝස්ටුව 3. මතකයන් ඔබේ… | Remind Me

මා ප්‍රියකරන කන්ට්‍රි ගීත අතරින් මේ තවත් ගීතයක්… ගම්බද ගොවිපළක රැකියාවක් සොයා යන තරුණයෙක් ඉතා කෙටි කලකින්ම එයට සමුදීමට සැරසෙන්නේ තමාට පැවරුණු දුෂ්කර රාජකාරි වලින් හෙම්බත්වීම නිසයි... තමා කොතරම් මෝඩ තීරණයක් ගැනීමට සූදානම් වූයේද යන්න ඔහුට පසක් කරමින් ගොවිපල හිමිකරුවාගේ දියණිය හදිසියේම ඔහුට දකින්නට ලැබෙන්නේ මේ අතරේයි...
අද ගීතය "ෆාර්මර්ස් ඩෝටර්" ගයන්නේ රොඩ්නි  ඇට්කින්ස්...

මියුසික් වීඩියෝව
Rodney Atkins - Farmer's Daughter

ගී පද

Rodney Atkins - Farmer's Daughter Lyrics


තවත් සිංදුවක් සමගින් හෙට හමුවෙමු..!!!

Tuesday, July 10, 2012

මතකයන් ඔබේ… | Remind Me

මේ බස් රේඩියෝ බ්ලොග් සතිය වෙනුවෙන් පළවෙන තෙවෙනි පෝස්ටුව…
පලවෙනි පෝස්ටුව 1. හාදුවක්! සඳ එළියේ… | Just A Kiss
දෙවනි පෝස්ටුව 2. ටිකිලා සහ නුඹ, නිරතුරු මා මත්කරන… | ‍You and Tequila make me crazy

මේ ගීතයෙන් කියවෙන්නේ කලක් ආදරයෙන් සිටි පෙම්වතුන් යුවලක් වෙන්වීමෙන් කලකට පසු නැවත හමුවූ විටෙක ඇතිවෙන දෙබසක්… සවන්දුන් පළමුවරම මගේ හදවතේ හිට්වුණ මේ ගීතයට මම තවමත් ආසයි…
ඔවුන්ගේ ආදරයෙන් පිරුණු අතීතයේ ශෘංගාරාත්මක සිදුවීම් සිහිකරන මේ ගීතයේ එක තැනක තියෙනවා නිකං මේ වගේ කෑල්ලක්…

ගැ : ඔබට මතකද එදා ගුවන්තොටුපලේ….
ඔබ මා හැරලන්නට ආ දිනේ….
සමුගැනීමේ හාදුව අපේ… ගොඩක් දික් වුණා…
පි : ඔව්, ඔබට ගුවන්යානයත් එදා වැරදුනා…
ගැ : ඉතිං හොඳයිනේ… තව රැයක් අපි එකට ගතකලා…

Smile මට හිනාවෙන්නද අඬන්නද කියා හිතුනා ඒ කෑල්ල අහද්දී…

ගයන්නේ Brad Paisley සහ Carrie Underwood

මියුසික් වීඩියෝව
Brad Paisley - Remind Me (Duet With Carrie Underwood)

ගී පද
Brad Paisley - Remind Me (Duet With Carrie Underwood) Lyrics

MP3 සිංදුව බාගන්න…
Brad Paisley - Remind Me (Duet With Carrie Underwood)

තවත් සිංදුවක් සමගින් හෙට හමුවෙමු..!!!

Monday, July 9, 2012

ටිකිලා සහ නුඹ, නිරතුරු මා මත්කරන… | ‍You and Tequila make me crazy

මේ බස් රේඩියෝ බ්ලොග් සතිය වෙනුවෙන් පළවෙන දෙවෙනි පෝස්ටුව…
පලවෙනි පෝස්ටුව 1. හාදුවක්! සඳ එළියේ… | Just A Kiss

අන්තර්ජාලයේ මේ ගීතයේ තේරුම විවිධ විදියට තේරුම් කෙරෙනවා… කෙනෙකුට එය අනියම් ප්‍රේමයකින් මිදෙන්නට නොහැකිව ලතවෙන පෙම්වතෙකුගේ වේදනාවක්… තවත් කෙනෙකුට එය මත්ද්‍රවය වලින් මිදීමට පුනරුත්ථාපනය වෙන කෙනෙකුගේ සිතෙහි නැගෙන සිතිවිල්ලක්… මේ කිනම් ආකාරයෙන් විස්තර කලත් මේ සුන්දර ගී පද වල වටිනාකමේ අඩුවක්නම් නොවන බව නිසැකයි…

“Cause you and Tequila make me crazy
Run like poison in my blood
One more night could kill me, baby
One is one too many, one more is never enough…”


ගයන්නේ Kenny Chesney සහ Grace Potter

මියුසික් වීඩියෝව
Kenny Chesney - You And Tequila ft. Grace Potter

ගී පද
Kenny Chesney - You And Tequila ft. Grace Potter

MP3 සිංදුව බාගන්න…
Kenny Chesney - You And Tequila ft. Grace Potter

තවත් සිංදුවක් සමගින් හෙට හමුවෙමු..!!!

Sunday, July 8, 2012

හාදුවක්! සඳ එළියේ… | Just A Kiss

බස් රේඩියෝවෙන් මේ දින වල කෙරෙන ප්‍රමෝෂන් එක “බස් රේඩියෝ බ්ලොග් සතියට” සහයෝගය දක්වන්න අවශ්‍ය වුනත් හති ඇර ඇර බ්ලොග් ලියන මම වගේ පුඟුලෙකුට දවස් හතට පෝස්ට් හතක් කියන්නේ ලොකු අභියෝගයක්… ඒ නිසා මේකට දායක වෙන්නේ කොහොමද කියන එක ගැන හිතද්දී අවා හරිම සිම්පල් ප්ලෑන් එකක්…

සිංහල බ්ලොග් අවකාශයේ සිංහල සිංදු වෙනුවෙන්ම වෙන්වුනු අඩවි කිහිපයක්ම තියෙනවා… තිස්ස අයියා, වැම්පා ඇතුලූ මෙකී නොකී කිහිපයක්ම… බ්ලොග් ඇඩ්‍රස් එක මතක නැති වුණත් ඉංග්‍රීසි ගීත හඳුන්වාදීම වෙනුවෙනුත් බ්ලොග් අඩවි එකක්, දෙකක් තිබුණා මතකයි…

ඉතින් “බස් රේඩියෝ බ්ලොග් සතිය” වෙනුවෙන් ලියවෙන මේ පෝස්ට් කිහිපයෙන් මම බෙදාගන්නට උත්සාහාකරන්නේ වැඩිපුර ඇහෙන්නේ නැති ඉංග්‍රීසි ගීත කිහිපයක්… ඉංග්‍රීසි ගීත ඇසීම මගේ විනෝදාංශයක් නම් නෙවෙයි… නමුත් මොකද්දෝ හේතුවකට මම අසාමාන්‍ය ලෙස කන්ට්‍රි සින්දු ප්‍රිය කරන්නෙක්… මීට පෙර මා අකුරු බ්ලොග් අඩවියේ එවැනි ගීත කිහිපයක් ගැනම පෝස්ට් පළකලා මතකයි…

ඉතින් මේ එවැනි ගීත කිහිපයක් බෙදාගැනීමේ උත්සාහයේ පළමු පියවර… අවසාන වශයෙන් මේ හැම ගීතයකටම වාගේ මම අසීමිත ලෙස කැමති සංගීතයටත් වඩා ඒවායේ ඇති මනබන්දනීය පදමාලා වලටයි… ඒ නිසා වෙලාව ඇතොත් පදමාලාව රසවිඳින්න අමතක කරන්නෙපා…

මියුසික් වීඩියෝව
Lady Antebellum - Just A Kiss

ගී පදමාලාව
Lady Antebellum-Just A Kiss LYRICS

MP3 සිංදුව බාගන්න…
Just A Kiss mp3
තවත් සිංදුවක් සමගින් හෙට හමුවෙමු..!!!

Sunday, July 1, 2012

52. සිතුවිලි අතරේ රඟන්නී | Dancin' Away With My Heart



ගතවෙමින් තිබුණේ විශ්‍වවිද්‍යාලයේ අවසන් වසරේ සමුගැනීමේ සාදයේ අවසන් හෝරා කිහිපය… 

පමණට වඩා මත්වුණු තරුණ තරුණියන් බොහොමයක් දෙනා සිටියේ බමන  මතින් නටමින්… සමහරු  තව තවත් තම මධු බඳුන් මධුවිතෙන් පුරවා ගනිමින්…  හරියට හැමදෙනාම මේ ශෝකී සමුගැනීම පියවි සිහියෙන් කරන්නට බිය වූවා වැනියි… අඩ අදුරේ පැතිරුණු මීදුමක් වැනි සුදුමැලි ආලෝකය තුළ සැඟවුණු පිරිස අතරේ මා නෙත් දිව ගියේ ඇය සොයනා අටියෙන්…

ඇය සිටියේ රාත්‍රී සාදයකට නොගැලපෙන නමුත් සමුගැනීමකට අතිශයින්ම සුදුසු, සුදෝ සුදු ගවුමකින් සැරසීගෙනයි… වෙනදා මෙන්ම නිමේෂයක් මා නෙතඟ පැටලී ඉවතට  ඇදගන්නා ඒ නිල් ඇස් වලින් මාගේ බැල්ම මඟහරිමින්… වැරෙන් බැඳුණු සංස්කෘතික යදම් ලිහා ගත නොහී පුරා වසර තුනක් ඇස් වලින් කතා කල අප දෙදෙනා අදින් පසු යළි මුණ නොගැසේවී… ඉන්දියාව විසල් රටක්… බැංගලෝරය විසල් නගරයක්… මා මව් රටට පියඹද්දී ඇය මේ නගරයේ මිලියනයක් මිනිසුන් අතරේ සදහටම සැඟවී යාවි… අපව එකිනෙකාට අහිමි කරවමින්…

වාදනය වෙන්නට පටන් ගත්තේ සතුටු සාදයේ අවසන් ගීතයයි… වසර තුනක් පුරාවට ගොළුවූ මා සිතට බීර මත අලුත් දිරියක් රැගෙන ඇවිත්… අද නොවේනම් ආයේ කවදාවත් නොවේ… එක් එල්ලේ ඇය වෙත ඇදුණු මම, මාගේ සුරත ඇය වෙත දිඟු කළේ දෙවරක් නොසිතාමයි…

“ශැල් වී…?”

ඇය පිළිතුරු දුන්නේ නැහැ… අඩුම ගණනේ හිස ඔසවා මා දෙස බැලුවේ වත් නැහැ… තම වෙවුලන ඇගිලි තුඩු වලින් මා දිගුකල සුරත අල්ලා ගත්තා පමණයි… උණුසුමට මට දැනුණේ ඇගේ සිහින් සියුමැලි ඇගිලි තුඩු වලට වේගයෙන් ලේ පිරෙනා අයුරු විය යුතුයි… සංගීත රටාවට පැද්දෙන මා උරහිසේ දැවටුණු ඇයගේ නිකටේ උණුසුම මේ දැනුත් මට විදින්නට හැකියි… නැවත දකින්නට නොලැබෙන ඒ නිල්වන් ඇස් සිත් සේ දැක ගන්නා අටියෙන් මුහුණට වැටුණු ඇගේ අකීකරු කෙස් රොදක් මා මෑත් කරද්දී ඇයගේ සියුමැලි කන්පෙති රත් පැහැ වූවා මට මතකයි… සංගීත හඬින් සහ මිතුරු මිතුරියන්ගේ කෝලාහලයෙන් පිරුණු පරිසරයේ මා පවසන යමක් අසා ගැනීමට තම මුහුණ මා වෙත ලංකරන ඇයගේ කම්මුල් මා දෙතොලෙහි ස්පර්ශ වෙද්දී එය ඉන් මුදවා ගැනීමට ඇයට කලබලයක් නැති ගානයි… සාදයේ මේ අවසන් ගීතය නොනැවතී සදහටම වාදනය වෙනවා නම්..?

සොඳුරු සිත්තමක් වැනි මතකයක් ඉතිරිකර කාලය බොහෝ දුරක් ඉගිල ගිහින්… අපි නැවතත් හමුනොවනා ලෙසින්ම… අහිමි වීම මා සමඟින් මෙතරම් දුරක් ඒවි යැයි මා කිසිදා දැන සිටියේ නැහැ… නිමා නොකළ රැගුමක මිහිරියාව පමණක් මාවෙත ඉතිරිකර නික්මුණු ඇයගේ සොඳුරු මතකය මෙතරම් කාලයකට පසුවත්, සිතුවිලි අතරේ දඟකරනායුරු විශ්මයජනකයි… 

සදාකාලික තාරුණ්‍යයක මා සිර කර නික්ම ගිය සුහදිනියේ, අසුරු සැණක් වන් මොහොතකට වුව හද ගැහෙනා තාලයට අප පාද තැබූ ඒ රංගනය ඉදහිට දිනෙක මට සිහියට නොඑනවාම නොවෙයි…
ලෝකයේ කොහේ හෝ කොනක ඉතින් ඔබ සුවෙන්ද..?

ලේඩි ඇන්ටබෙලම්… මියෙන සිතුවිලි වලට ඔබ ගීතයෙන් පණ පොවනා හැටි හරි පුදුමයි…


Lady Antebellum - Dancin' Away With My Heart
පිංතූරය : http://fineartamerica.com
Web Statistics